Comunicado de refundación del FUSOA

El Fondu de Solidaridá Obrera d'Asturies (F.U.S.O.A.) creóse nel entamu de los años setenta, por persones d’estremada ideoloxía dientru la izquierda embaxu unes condiciones mui distintes a les d’anguañu y por mor al xorrecer de les lluches y griesques obreres, con una represión durísima.

L'altu gráu de participación fizo que la iniciativa tuviere esitu abondo como se comprobó nel sofitu que recibieron güelguistes, represaliaes y preses que s'enfrentaben y lluchaben escontra'l capital.

Güei vese necesariu de nueves ponelu a furrular delantre l'esfarraplamientu y crisis del movimiento obreru y la so debilidá frente al más mínimu ataque por parte'l poder.

El FUSOA arriendes de les caxes que sigún los casos formábense en momentos concretos de conflicto llaboral, propón un furrulamientu permanente na recoxía de fondos y la so acumulación en dómines de 'aposentamientu' llaboral y social, con vistes a lluches nel futuru.

Esti sofitu nun se llindará namái qu'al ámbitu económicu, y ampliaranse al másimu les posibilidades de sofitu en común y n'andecha. Enxamás sedrá un subsidiu, sinon una contribución empobiná a toles persones o colletivos que, por la so llucha, seya represaliáu dientru o non del marcu llaboral y sufra les consecuencies enforma represives coles que nos regala’l sistema.

La solidaridá, resistencia, conciencia de llucha son valores que parecen arrequexaos a un lloñe pasáu y qu'atopen güei munches torgues pal so resurdimientu. Por embargu, son valores imprescindibles nes circunstancies sociales y llaborales d'anguañu, ya que na sociedá d'agora la conflictividad va más allá del espaciu esclusivu de les relaciones de trabayu, delantre l'apaición de lluches sociales que tamién cuestionen el sistema capitalista y sobre les que cai la más cruda represión (insumisos, ocupes, xóvenes marxinaes del mundiu llaboral..).

El FUSOA tien d'ampliar la so actuación solidaria a toa aquella persona que lluche polos mesmos enfotos que los de la clase obrera, aunque estén fuera de les empreses.

Baltiar esta dixebra que'l capital quier imponer a los y les trabayaores ye una xera que'l FUSOA tamién tien d'entamar.

Los conflictos llaborales caberos amuesen que la capacidá de resistencia de les obreres va xuncía dafechu a los recursos de sobrevivencia que xeneren éstes trabayaores y que sofiten nun solo el día a día de cada persona, sinon tamién a afalagar la llucha.

La necesidá esiste.

Collabora col FUSOA.

Espande la idega.