Del proletariau revolucionariu y l'Asturies roxa

Del proletariau revolucionariu y l'Asturies roxa.

A setenta años d'ochobre del 34

Cúmplense setenta años nestes feches de la última insurrección proletaria sucedida n’Europa: la de la comuna asturiana d’ochobre de 1934. Una remembranza políticamente incómoda de xestionar, como amuesa la sordina cola que va conmemorase. Ensin respaldu institucional y ensin iniciatives d’especial miramientu, dicho sía esto último ensin facer de menos los actos, conferencies y documentales qu’unos cuantos voluntariosos van promover con fuerces tan escases como disperses. Tampoco pue chocar, en tiempos d’una esquierda ideolóxicamente al debalu que cada vez alcuentra más dificultaes pa reconocese nel so pasáu y nel contextu d’una sociedá que necesitó un cuartu de siglu de normalidá democrática p’atrevese a mirar de frente a les mancadures dexaes pola represión franquista y obtener de les sos instituciones una rehabilitación de la memoria de les víctimes. Si esto pasó cola dictadura y la so siniestra estela de dolor, más complicada preséntase la reivindicación d’un asaltu revolucionariu al poder que nun dexa de constituir una ruptura cola llegalidá institucional de la Segunda República y que, a los güeyos de munchos, prefigura la traxedia del enfrentamientu civil desatáu en 1936. A partir d’ehí, namás la Ilesia Católica parez en condiciones d’extraer elementos lexitimadores al traviés de la elevación de los sos mártires a los altares, d’alcuerdu cola incontinencia beatificadora y canonizadora del actual pontífice. Fuera d’esto, grupos de xóvenes comunistes buscando referentes nos sos bisagüelos, dalgunos nacionalistes asturianos más necesitaos de xestes épiques que de rigor hestóricu y unos pocos autores más o menos atraíos por un episodiu de dramática intensidá.

Cola fuerza de los mitos, la fe nun proletariau revolucionariu que llevaba nel códigu xenéticu la misión histórica d’allumar una nueva sociedá ensin clases que fixere desaparecer pa siempre la explotación del home pol home va perdurar a lo llargo de más d’un sieglu. Pero, fuera de la coxuntura abierta pola onda expansiva de la revolución soviética y el colapsu del orde establecíu nel que desembocó la Primer Guerra Mundial, la experiencia nun proporcionaba demasiaos exemplos nos que se pudiere apoyar dicha confianza. N’Europa, l’ochobre asturianu de 1934 cerrará, a esti respectu, un ciclu abiertu pola Comuna de París de 1871. D’ehí n’alantre, les grandes movilizaciones obreres nun van volver adoptar la forma de revuelta armada con vistes a la toma del poder. Pero la fascinación pola tráxica derrota de los que per un momentu creyeron llegada la hora de cambiar al mundu de base, y arriesgáronlo too nel intentu, revelaráse muncho más persistente.

La potencia inspiradora nel tema de la revolución asturiana quedó mui prontu de manifiestu: na obra teatral d’Albert Camus “Révolte dans les Asturies”, na cartelística republicana del 36, na poesía d’autores como Alberti o Pedro Garfias, na rápida popularización de la canción dedicada a Aida de la Fuente... Tamién d’inmediato vuélquense enerxíes na prolongación de los combates al traviés de la lletra impreso, forxando dos versiones antitétiques de los sucedío. Dalgunos de los debates pseudohistoriográficos inda vixentes arrinquen de los testimonios de los protagonistes, peñeraos d’una banda polos aparatos de les organizaciones obreres (ente les que mui pronto sobresal la eficacia de los comunistes nel axit-prop) y d’otra pola propagandística católica y reaccionaria. A nadie se-y escapa que’l fogonazu d’aquelles dos selmanes d’ochobre constitúi una pieza clave na construcción del mitu de l’Asturies roxa y dinamitera, yá sía na so versión d’épica revolucionaria protagonizada por heroicos mineros o na lleenda negra de les sangrines hordes proletaries. Les destrucciones producíes polos intensos combates sosteníos n’Uviéu, con especial incidencia nes destrucciones de símbolos relixosos como la Cámara Santa; la violencia revolucionaria, qu’alcuentra’l so llau más escuru nes muertes de Turón, y la dura represión posterior, exemplificada na matanza de Carbayín, l’asesinatu del periodista Luis de Sirval y la brutalidá de les tortures practicaes pol comandante Lisardo Doval, proporcionen los principales ingredientes.

Asturies focaliza toles pasiones desataes. Nel so suelu produciéronse los enfrentamientos armaos ente obreros y unidaes del Exércitu, prolongando la insurrección por espaciu de dos selmanes. Anque’l movimientu revolucionariu fuere programáu pa toa España polos sos instigadores (un “estáu mayor” de notoria ineptitú que más paecia tener en mente un pronunciamientu decimonónicu qu’una revuelta obrera y depués de llamar a la fuelga limítase a encerrase nuna vivienda madrileña n’espera d’acontecimientos), únicamente n’Asturies cuaya nuna verdadera toma del poder. La tentativa de la Esquerra en Cataluña, en mediu de la pasividá de los anarcosindicalistes, ye sofocada con facilidá, de la mesma manera que les escaramuces producíes en Madrid y otros focos que por mor del so aislamientu malapenes tuvieron oportunidá (Mondragón, Eibar, marxe esquierda del Nervión, Reinosa, Barruelo de Santullán, Guardu, Vil.lablinu, Medina de Rioseco, Algeciras, Teba, La Carolina, Villarobledo...). Lo que pasó n’Asturies pertenez a otra categoría: asaltu a los cuarteles, toma d’ayuntamientos, formación de comités revolucionarios y, ensin dilación, ensayu d’una nueva sociedá que, sigún los casos, pue entrañar el control obreru de les fabriques o incluso la supresión del dineru. En definitiva, la puesta en práctica de la utopía revolucionaria que’l movimientu obreru fixárase como horizonte dende los sos entamos. ¿Qué condiciones se daben n’Asturies pa que, como en nenguna otra parte, el llamamientu cuayara en forma insurreccional y de revolución social? Delles respuestes puen ser apuntaes pa explicar esi xugase la vida nuna partida. La unidá de toles fuerces obreres, la patente disposición a la llucha d’unes bases radicalizaes y l’accesu a armes y dinamita pa traducir esa voluntá n’acción formen ensin dulda parte d’elles.

La frustación de les esperances depositaes nel advenimientu de la República, el temor al ascensu del fascismu y les ansies de construir el socialismu combínense ente les motivaciones. La derrota electoral de la esquierda en 1933 punxere términu a les reformes entamaes dos años enantes y la entrada de la CEDA nel gobiernu suponía una amenaza cierta del so completu desmantelamientu, si non de males mayores. Sobre esti tresfondu, la secuencia de los acontecimientos n’Asturies ayuda a entender l’españíu d’ochobre. En febreru de 1934 los mineros asturianos pararen en solidaridá colos socialistes austriacos, llevantaos en Viena contra la dictadura del canciller Dollfus. La pantasma del fascismu ta yá mui presente ente los trabayadores asturianos. Al mes siguiente, la Rexonal de la CNT, rompiendo coles directrices afitaes nel so Comité Nacional, soscribe colos socialistes el pautu de l’Alianza Obrera, creando una situación d’unidá inédita nel restu del Estáu y d’induldable relevancia nel cursu posterior de los acontecimientos. La salida de los socialistes del gobiernu fixo posible l’alcuerdu, al experimentas éstos un xiru radicalizador que coincide coles posiciones unitaries nes que se mueve la Rexonal cenetista, col telón de fondu del ascensu del fascismu en toa Europa, la creciente politización de los conflictos obreros y l’horizonte revolucionariu cada vez más presente nos discursos. Inda fuera de l’Alianza, el PCE tien n’abril un éxitu parcial nel so llamamientu a la fuelga contra una concentración de la CEDA n’El Escorial. El mesmu sentíu alquiere la fuelga xeneral convocada’l 8 de setiembre pola totalidá de les fuerces obreres cola fin de boicotear un mitin de Gil Robles en Cuadonga, que llogra paralizar Asturies. Nes selmanes posteriores, el PCE revisará la posición d’hostilidá hacia l’Alianza Obrera, solicitando’l so ingresu, colo que se completa la unidá de les fuerces obreres en víspores d’una revolución tan anunciada como mal preparada, na que, ensin directrices clares y ensín programa conocíu, hasta la iniciativa yera concedida al enemigu, al depender la convocatoria de la entrada nel gobiernu de la CEDA, fechu que se produz el 4 d’ochobre.Los preparativos y la decisión final correspuenden a los dirixentes socialistes, que rompieron cola so tradicional moderación gradualista y posibilista p’adentrase na sienda revolucionaria. El comité asturianu, onde –a diferencia de Madrid- alcuéntrense representaes toles fuerces, reflexa a la perfección esti xiru, al tar paradóxicamente encabezáu por prudentes y pragmáticos prietistes como Belarmino Tomás y Ramón González Peña que mamaron el sindicalismu na escuela de Manuel Llaneza. Únicamente nos díes finales, cuando llega’l momentu d’optar ente la resistencia a ultranza o la capitulación, increméntese’l pesu de los comunistes. El balance va saldase con más de 1300 muertos n’Asturies y alredol d’un centenar nel restu de los focos insurrectos. Tres la durísima represión desatada, les fuerces obreres cifren los sos esfuerzos a lo llargo de 1935 en recomponer les sos manferíes organizaciones, recuperar los sos muérganos d’expresión clausuraos y canalizar la solidaridá colos presos. De la bandera colorada a la tricolor, les aliances oriéntense agora hacia la fórmula del Frente Popular, que sustitúi la unidá proletaria con propósitos revolucionarios pol alcuerdu cola esquierda burguesa en clave antifascista. Finalmente, les elecciones de 1936 dan la victoria a les esquierdes por estrechu marxe. N’Asturies, esta mayoría sáldase con una diferencia d’unos 20000 votos. En cierta manera, les urnes avalen l’afirmación de Belarmino Tomás proclamando nel momentu de capitular que fueren derrotaos pero non vencíos.

Rubén Vega

Espublizau en: Les Noticies, ochobre'l 2004.
Dixitalización: El cielu por asaltu.