El cielu por asaltu

Recuperar la dignidá, recuperar la llucha. Documentos pa la hestoria del movimientu obreru y la clase obrera n'Asturies.

Nombre:

jueves, julio 02, 2009

Entrevista a Rubén Vega II

La llucha antifranquista tuvo nel movimientu obreru asturianu ún de los principales aliaos. Asina, les güelgues d’abril de 1962 convirtieron a Asturies nun puntu de referencia pa tolos que s’interesaben pola evolución social y política de la España de la época. La Fundación Juan Muñiz Zapico vien desenvolviendo, dende hai yá tres años, un intensu llabor pa recuperar la memoria histórica. Pa ello organizó exposiciones (una pue vese inda nel CAMCO), publicaciones de llibros, congresos y debates. Daquella, había una lluz n’Asturies.

–Ustedes, dende la Fundación Juan Muñiz Zapico, tán entamando una serie d’investigaciones, publicaciones y actos pa recuperar la memoria de la Güelgona del 62. ¿En qué consisten?

–Ye un proyectu de llargu plazu; yá llevamos tres años. Ye un programa d’investigación histórica, pa lo qu’hubo que formar un grupu d’historiadores que sacaran alantre’l llabor. Tamién publicamos estos resultaos nel llibru tituláu «Hay una luz en Asturias. Las huelgas de 1962 en Asturias», acabante publicar por Trea y que yo coordiné. Tamién fiximos un congresu, qu’organizamos pel branu en collaboración cola Universidá d’Uviéu, y que va orixinar un prósimu llibru, a publicar a fines d’esti mes, sobre les güelgues del 62 nel restu d’España y la repercusión internacional. Nesi congresu reunimos a historiadores de les comunidaes onde hubo dalguna incidencia de la güelga, y dalgunos que vinieron de fuera del Estáu o a tratar cuestiones xenerales. Esti llibru va titulase «El camino que marcaba Asturias. Las huelgas de 1962 en España y su repercusión internacional». Lo del «camín que marca Asturies» parafrasea un lema del PCE d’entós. Depués de 1962, Asturies realmente conviértese nuna referencia inescusable pa tola oposición al Franquismu.

–Efectivamente, munchos investigadores afirmen qu’el 62 asturianu ye una especie d’ecuador sociolóxicu del Franquismu. ¿Cómo se concreta eso?

–Efectivamente, les güelgues del 62 constitúin una bisagra no que ye la movilización social contra’l Franquismu. Nun ye que sían les primeres güelgues, nin siquiera que signifiquen el principiu de la movilización opositora; pero tolo qu’hubiera antes tuviera un carácter geográficamente concentráu (en Vizcaya, Barcelona, Asturies); toles güelgues anteriores taben mui localizaes, mui disperses nel tiempu; amás, la movilización obrera diba per un llau, la estudiantil per otru y la cultura d’oposición de los intelectuales per otru. Hasta’l 62, toos estos yeren sectores desconectaos, y ye nesti momentu cuando cuaya una auténtica movilización antifranquista.

–¿Esto cómo foi?

–D’un llau, dase la mayor güelga con anterioridá y con posterioridá. Simultáneamente, a lo llargo del mes d’abril, la suma total de güelguistes da unos 300.000. Amás, territorialmente afecta –agora podemos dicilo con abonda base de certeza– a 28 provincies. Eso nun pasara nunca. Más tovía: esa güelga –no que foi el focu, les Cuenques mineres asturianes– consigue que’l ministru José Solís –que yera Secretariu Xeneral del Moviento y Delegáu Nacional de Sindicatos, el que yera’l másimu responsable depués de Franco del partíu y el sindicatu oficial– negocie colos güelguistes (que yeren delincuentes pal Réxime, dada la illegalidá de la movilización). Y non negocia con representantes institucionalmente reconocíos, verticalistes, negocia con comisiones d’obreros. Esto da-y a la güelga una dimensión política estraordinaria. Ye la única vez que sucede nel Fanquismu: nin antes nin depués un ministru se ve forzáu a negociar.

–Tuvo que ser un momentu impresionante.

–Solís pasa una selmana n’Asturies. Va a Mieres, va a Llangréu. Métese na Sindical, onde recibe a empresarios, verticalistes y depués a comisiones d’obreros formaes por sindicalistes que depués van ser bien conocíos. Negocia con ellos, fai concesiones, fala por radio colos asturianos –especialmente colos mineros–, recibe periodistes y, sobre too, fai concesiones. Hasta’l puntu que cuando vuelve a Madrid métese nun Conseyu de Ministros y d’ehí sal una prima de 75 pesetes por tonelada de carbón pa que revierta nun aumentu salarial na minería. Esto sal publicáu nel Boletín Oficial del Estáu cuando la güelga inda taba vixente, coles mines paraes. En términos políticos, el Franquismu sufrió d’aquella una derrota de primer magnitú. Significó que los sindicatos verticales nun taben funcionando y nada menos qu’un ministru de Franco negocia colos güelguistes, cede y publica nel BOE la ratificación del Conseyu de Ministros, la concesión que fai pa desactivar la güelga.

–Esto tuvo unes consecuencies inmediates.

–La Güelga de 1962 pon pates arriba’l sistema qu’entós venía funcionando de censura de la información. Inmediatamente depués de la güelga va haber un cambiu de Gobiernu y Arias Salgado, que yera’l responsable de la censura, da pasu a Francisco Fraga Iribarne. Nun ye que llegara la llibertá d’información, pero sí que s’intauró otra manera. Fraga tien idees nueves y, sobre too, fai una llectura de la güelga. N’abril del 62 descubrieron que yá nun yera posible’l silenciu. ¿Qué yera lo que fixeran n’abril hasta que se declara un Estáu d’Escepción que, por cierto, nun-yos valió de nada, yá que la güelga siguió medrando durante y depués del Estáu d’Escepción? Nun dicir nada. Nes hemeroteques pue vese que nun hai nenguna referencia al paru xeneral de la minería asturiana, la siderurxa de Fábrica de Mieres y, posiblemente, la de Duro Felguera tamién. El silenciu informativu foi absolutu. A partir d’ehí, saquen una conclusión: como la xente nun alcuentra información verosímil acude a les radios estranxeres.

–Radio Pirenaica, claro.

–Radio Pirenaica tien daquella una fuerza impresionante, que sal en tolos informes confidenciales de la Guardia Civil. Tamién ta Radio Praga, Radio Moscú, Radio Bucarest, la BBC... tamién Radio París. La Pirenaica consigue desmantelar l’aparatu informativu franquista d’una manera mui eficaz. Esto consigue que’l Franquismu cambie la so política de censura. En 1968 hai otres güelgues, n’agostu y setiembre, y lo qu’apaez nos periódicos yá se paez al periodismu. Vázquez Prada, que dirixe «Región», va a les Cuenques y entrevista a mineros. Yá reconocen que la güelga esiste.

–Tuvo que ser un tragu difícil de pasar pal Réxime...

–Como-y digo supunxo un corte. Incluso hai un momentu en que’l Gobiernu se plantea reconocer de forma limitada’l derechu de güelga. Hai notes manuscrites de Franco considerando la propuesta. Al final lo que fixeron foi sacar un Decretu de Conflictos Colectivos pero que nun la reconoz.

–Falábame que’l movimientu nun foi namás obreru. Tamién lo foi estudiantil y qu’eso supunxo un golpe que nun pudo asimilar el Franquismu.

–La güelga del 62, per primer vez, tien esa nueva dimensión: treslládase tamién al movimientu estudiantil. En Barcelona, Madrid y Valencia hai estudiantes que se movilicen. Hai represalies previes (en febreru detienen en Barcelona a varios d’ellos) y tienen reivindicaciones propies: quieren que la Universidá de Navarra, del Opus, nun emita títulos oficiales. ¿Pero qué ye lo que dicen cuando se manifiesten pela Cai San Bernardo de Madrid o na Plaça de Catalunya?: «Asturias, sí. Opus, no»; «Asturias, sí, Franco no». ¿Por qué detienen a Manuel Vázquez Montalbán na puerta de la Universidá Central de Barcelona? Por cantar l’«Asturies, patria querida», que se convierte nun cantar subversivu.

–¿Cree usté qu’un conflictu como aquel diba ser posible güei?

–Ye mui difícil que güei se dean circunstancies pa un modelu de conflictu como aquel. La güelga del 62 tuvo una dosis notable d’espontaneidá. Nun foi una güelga programada: foi un fenómenu que se contaxó básicamente por simpatía y solidaridá. Los xornaleros andaluces, o los campesinos de Jerez o Don Benito, teníen unes reivindicaciones propies pero siguen la estela de lo que pasa n’Asturies y se difunde pela Pirenaica o peles organizaciones clandestines. Los conflictos tienen agora otra dinámica, aparte de que’l movimientu obreru se bate en retirada dende hai munchos años. La clas obrera ta sufriendo un procesu d’acosu: la globalización endurez les condiciones del mercáu de trabayu, estableciendo una correllación de fuerces nalgún sentíu más desfavorable pa los trabayadores y, n’otru, más favorable. Pero no que diz respecto a la cohesión interna de la clas, les condiciones son agora muncho más adverses. Les condiciones nes que se llucha –la llegalidá– son muncho más favorables que na dictadura, evidentemente.

–Lleendo’l volume «Hay una luz en Asturias» rescampla’l carácter sufríu y heroicu d’aquella xente.

–Aguantar dos meses de güelga, como s’aguantó, significa pasar fame. Dalguna de les muyeres cola que falamos, encargada de los comités de solidaridá, contónos que nun pidíen dinero, pidíen comida. La HOAC, la xente de Cáritas, pide comida; o creen comedores. La xente llevaba a comer a casa a los güelguistes. Hubo una solidaridá popular tremenda, y a ello hai qu’añedir la solidaridá internacional que se desencadenó.

–La güelga foi un aldabonazu na conciencia de los intelectuales españoles. ¿Qué papel xugaron?

–Hubo una repercusión importante, primero, nel mundu intelectual, y segundo, nel planu internacional. Nel mundu intelectual hai un manifiestu qu’encabeza Ramón Menéndez Pidal. Rápidamente sucédense otros suscritos en México y Francia. Namás n’España hai 200 intelectuales que firmen, dalgunos veníos de la derecha más rancia: Laín Entralgo, Tovar, Dionisio Ridruejo... Tamién taben Aranguren y comunistes como Buero Vallejo, Celaya, Alfonso Sastre. En realidá, el manifiestu úrdelu’l PCE en Madrid.

–¿Cuál foi el papel del PCE nesti conflictu?

–El PCE en 1962, como antes y depués d’esta fecha, ye la principal organización d’oposición al Franquismu. Probablemente ye la organización que ta presente en más puntos onde la güelga se da. Tenía Radio Pirenaica, lo qu’amplificaba la so voz. En 1962 ye’l PCE’l que se mueve, anque los socialistas tamién se mueyen. Los anarquistas malapenes queden organizaos, pero los pocos que queden tamién actúen. Depués tán los cristianos, que ye la gran novedá, xente que vien del mundu cristianu y dinamiza’l movimientu social. Incluso hai cures que participen activamente na güelga. Otru de los factores claves de la güelga ye la plasmación d’una contradicción del sistema: l’apartamientu de ciertos sectores de la Ilesia y el Gobiernu. Hasta ésa fora un matrimoniu que yeren ún pa otru, que yera prácticamente una simbiosis, conviértese nuna fonte de tensiones. Franco ta obsesionáu con esi tema. Nos documentos históricos vemos cómo esti tema lu trai de cabeza, porque nun entiende cómo ye posible qu’haya cures que se pongan del llau de los güelguistes, cómo ye posible qu’apoyen a los comunistes. En definitiva, cómo la xerarquía, que nun apoyaba abiertamente les posiciones de la oposición, polo menos nun les condena. La resquebra bien d’antes pero agora profundízase.

–La repercusión internacional foi enorme.

–Nós, nun vídeo que fiximos sobre esta güelga sacamos unes imáxenes bien elocuentes: sitios onde hai manifestaciones, colectes de solidaridá, declaraciones de sindicatos, partíos, parlamentos, editoriales de periódicos. Alcuéntreste con que nos cinco continentes tien repercusión. Asturies nunca saliera na opinión pública internacional d’esa manera dende 1934. Ehí sí que se pue establecer un paralelismu ente la revolución y la güelga de trenta años depués. Alcuentes informaciones y reportaxes de «Le Monde», de «Le Figaro». Tamién hai varios editoriales de «The New York Times», preocupaos por si «esto» será cosa de los comunistes, si el réxime yera estable o non, si les güelgues yeren llaborales o teníen otru conteníu. Hubo manifestaciones en cada pueblu d’Alemania o Francia, porque hai esiliaos o emigrantes. Y tamién en Sidney (Australia), amás de declaraciones de solidaridá que lleguen de Tanzania, Indonesia, Madagascar... La cuestión asturiana puense d’actualidá. Y esto lleva a un factor clave: el réxime en febreru solicitara abrir negociaciones col Mercáu Común. El resultáu ye qu’en febreru piden negociaciones y n’abril españa la güelga. Los intelectuales denúncienlo y el comunicáu sal en tol mundu. Ponse n’evidencia que n’España nun hai derechu de güelga, d’opinión, d’asociación, de reunión. La socialdemocracia europeo ciárrase entós en banda respecto a cualquier perpectiva d’almitir nel sen comunitariu al réxime de Franco, pero tamién un sector de la democracia cristiana y de la derecha, que yeren propensos a da-y cancha al Franquismu, recula nes sos posiciones. Esto último vieno reforzáu pol «Conturbeniu de Munich»: el réxime reacciona con una infinita torpeza, desata una campaña de prensa furibunda contra los que se reunieran en Munich. ¿Y quién se reuniera?: socialistes, lliberales y democristianos. Y esa yera la xente que gobernaba Europa.

–¿Por qué intenten recuperar la memoria de la güelga del 62?

–La Transición fundóse sobre un pautu d’olvidu. Ensin entrar a analizar si esto foi bono o malo, o simplemente xusto, yo creo qu’esi pautu nun pue durar siempre. Lo que nos propunximos foi facer un homenaxe a toa aquella xente que lluchó cuando too paecía perdíu, especialmente a los deportaos. El nuesu afán ye que se pague la deuda histórica a esta xente, a la resistencia anti-franquista. Y que se faiga al más altu nivel.

Xuan Bello


Publicáu en: Les Noticies, 24 de payares de 2002.
Fonte: Les Noticies.

Etiquetas: