Los resistentes, a contra lluz

Son munches les histories de los fugaos, anque como diz el cantar de Nuberu, «son coses que güei naide cuenta».

La vida de Mario Huerta, «L’home del Sacu», ye un símbolu de la resistencia humana frente a la inxusticia.

La historia que tamos viviendo ye lo que ye tanto polo que fomos como polo nun fomos. La terca resistencia de dalgunos, ¿redimirános de dalguna manera de lo que somos? Falo d’aquellos homes qu’un día decidieron tirase al monte, porque nun soportaben la inxusticia, y contra toda prudencia y pragmatismu anecieraron na alcordanza negándose a dase. Foron munchos los homes, coles sos lluces y les sos sombres, los que pel Franquismu llucharon por caltener la llaparada encesa de la dignificación social, munchos los que quixeron más pasar humillaciones, privaciones y trabayos a llevar una vida más o menos «decente» llibre de les prisiones y la violencia represora. Güei, n’acabando esti Ochobre del 2002, hai mui bien de coses que s’echen de menos d’aquellos quince díes de la Revolución d’Ochobre de 1934. Naquel pos, neses escases dos selmanes, l’Alianza Obrera consiguiera que los asturianos, tal vez per primer vez na so Historia, foran realmente dueños del so destín. Daquella triunfara la revolución anarquista en La Felguera, la socialista n’Uviéu y en Xixón, la comunista en Turón y en Grau.

Güei, cuando yá tamos pasando una páxina de la historia tal vez definitivamente, nin siquiera se consiguió construir (a dalgunos que podíen facelo nun-yos interesó) un discursu de la señaldá oxetiva que nos provoca aquel afán de xusticia, aquelles voluntaes xuntes en procura del bien social y la democracia. Con too y con eso, ellos tuvieron pol mundu cuando too paecía que diba vencer: sostuviéronlu sobre’l llombu y la conciencia republicana. Y gracies a ellos el mundu nun esbarrumbó dafechu.

Tres homes foron especialmente importantes na clandestinidá asturiana, toos tres lligaos al PCE: Mario Huerta, Horacio Fernández Inguanzu y Ángel León Camblor. Estos tres asturianos nun duldaron en «saltar» a la clandestinidá, reconstruyendo n’Asturies un movimientu obreru que nun diba tener tan dignos heriedes.

Mario Huerta foi el primeru d’estos tres en «saltar» a la clandestinidá. Naciera en Villarín, parroquia de Trubia, en 1915. Trabayó na Fábrica d’Armes y foi delantreru nel Juvencia, un equipu de fútbol local. En 1933 asiste al primer mitin del Partíu Comunista en Mieres Con 19 años yera miembru del Comité Rexonal y tuvo una destacada actuación nos sucesos de 1934. Derrotada la Revolución tuvo na cárcel hasta l’amnistía de 1936. N’acabando la Guerra Civil tírase al monte y en 1941 detiénenlu: intenta suicidase cortándose les venes de la muñeca esquierda. Tuvo en prisión once años y tres díes: Burgos, Ocaña y Uviéu. Cuando sal, impónse la xera de reconstruir el Partíu, pa lo que se pon a trabayar de viaxante, xera que-y permitía viaxar d’un llau a otru «ensin llevantar sospeches». Con too y con eso, tenía que presentase tolos meses ente los díes 1 y 5. Nesta situación taba cuando lu llamen a París p’asistir a un Congresu. Ellí, dícen-y que tien que desplazase a Praga, onde tuvo más de quince díes. Ente una cosa y otra pasaron dos meses, nos que nun fixo actu de presencia na Comisaría de Polícía. Cuando volvió, pa nun entrar a la cárcel, saltó definitivamente a la clandestinidá.

Andó per tolos pueblos del área central asturiana. Como traía y llevaba propaganda dientro d’un sacu punxéno-y d’alcuñu «L’home del sacu». Dormía en cuadres y en cabañes del monte, mui poques veces en casa de dalgún camarada. Nuna ocasión citóse con un enllaz nuna cabaña, en La Mosquitera. Pero a esti home (que se llamaba Mario como él) tardaron tres díes en day l’avisu. Cuando s’enteró, llegó a la cabaña onde alcontró a Mario Huerta cuasi a puntu de la inanición. «Llevo tres díes esperándote», dixo Huerta. « ¿Y qué comiste?», entrugó l’otru». «Nada», dixo Huerta. Y alegó que nun fuera a casa del enllaz pa nun comprometelu.

Los que lu conocieron daquella, recuérdenlu perpetuamente moyáu, yá que nun tenía gabardina. Cuando pillaba una moyadura, metíase nel payar ente la herba seco pa dormir y secase. Nuna ocasión foi a buscalu a la cabaña Vicente Gutiérrez Solís. Como nun lu alcontró dientro, salió al campu gritando «Cho, cho», la contraseña habitual. Alcontrólu desnudu, tiráu nel prau, secando al sol.

Mario Huerta actuaba, sobre too en Llaviana, Sama y Mieres. A mediaos de la década de los 50 entamaron les fuelgues mineres y Huerta yera l’encargáu de distribuir l’ayuda internacional que llegaba p’aliviar la situación de les familias represaliaes. El sistema yera fácil: metía billetes de 100 pesetes per baxo de les puertes. Anduvo per Asturies, París y Madrid. En 1969 cayó nuna depresión y marcha a Francia y a la Unión Soviética a reponese. En 1976 vuelve a Asturies onde va vivir hasta que muerre en Xixón, en 1996, nuna residencia d’ancianos. Qué coses nun contaría.

(Una anécdota que da un poco’l color d’aquellos primeros años de la Transición. Un militante comunista de Llangreu, Freixedo «Voló», volvió depués de munchos años a Sama –pasara pelos brutales penales de Burgos, Ocaña y San Marcos de Llion. Diba cola maleta pela cai y vio a un compañeru de partíu totalmente deformáu por una bomba que-y esplotara cuando la guerra civil y que-y mutilara una pierna y un brazu. Pasó xunto a él mirándolu de refilón, callando como un afogáu pa nun lu comprometer. L’home, sentáu nuna siella de ruedes, con esi acentu de la Cuenca entrugó: «¿Nun me conoces, Voló?». Y Voló, alegre por encontrar a un compañeru al que nuny importaba dase a conocer, contestó con sorna y alegría: «¿Voi conocete, ho? ¡Fáltate la mitá!»).

Manuel Parrondo


Publicáu en: Les Noticies, 27 d'ochobre de 2002.
Fonte: Les Noticies.